فى التوازى اللى أنتشر فيه أخبار عن أنتشار "جماعة النهى عن المنكر والأمر بالمعروف" فى بعض محافظات مصر
*بعيدا عن أنى مش مصدقه الموضوع دا وأن لو الكلام دا صحيح كان هيبقا فى شهادات من شباب كتير مش مجرد أخبار من جرايد بتجرى ورا فكرة الخبر اللى هيحقق أعلى أنتشار بين الجماهير
المهم فى الوقت دا شفت صوره نشرها كتير من الفريندز عندى عن عدم ألتزام زوجات وبنات ملوك العائله السعوديه بالزى الشرعى وأن رجال الدين لم يحركوا ساكن لهذا.
هو بعيدا عن أن رأى أصلا وأنتوا مال أبوكم كلكم ما كل واحد يلبس ولا يقلع زى ماهو عايز ,بس تطبيق لمبدء المساواه فى الظلم عدل فكمان المساواه فى التخلف عدل.
فأكيد أنا نفسى حد من اللى بيسموا نفسهم رجال دين وشيوخ يطلع يتكلم عن العائله السعوديه ومش بس نسائهم لاء يتكلم عن حفلاتهم وأموالهم وعلاقاتهم بالغرب , ومش عيلة ال سعود بس كل من نصبوا نفسهم كبار على شعوبهم.
لكن أنا كمان عايزه أتكلم فى الموضوع من وجهة نظرى
أميرات السعوديه أو زوجات وبنات الحكام العرب فى بلادهم العربيه بيلتزموا بالسلوك الأجتماعى طبعا للحفاظ على مكانة عائلاتهم وسط شعبهم و لأن دا العرف الأجتماعى , لكنهم أول ما بيخرجوا برا القيود الأجتماعيه دى بيبدوء يعملوا اللى هما عايزينه وأنا مش بعترض مع أى حد فى دا كل واحد حر.
الفكره أن دا بيعمله كتير جدا من شباب العرب مش بس البنات , تعرف كام حد من أصحابك سافر برا حدود قريتكم وراح مثلا للمدينه يتعلم وأتغير كتير جدا فى سلوكياته ولما بيرجع القريه بيلتزم بسلوك القريه ,أنا عن نفسى أعرف مهندسيين أصحاب أبويا أصولهم من قرى ممكن يكونوا منفتحيين جدا معاك فى الكلام والأفعال وساعات كتير فى تربية ولادهم لكن أول مايرجعوا زيارات لقريتهم كل شئ بيتغير وقيس على هكذا
النقطه أننا كشعوب بتصدر مننا أفعال وسلوكيات بيحكمها بشكل جذرى المجتمع اللى حواليك لكن مش مدى صحة أو خطأ الأفعال دى أو مدى قناعتك بيها أعتقد علشان كدا احنا شعوب مشوهه ماعندهاش قرار واضح فى حاجه مش قادريين نمسك طريق واضح محدد ونمشى عليه دايما بنفكر فى المنظر لكن عمرنا مافكرنا فى مدى صحة الفعل دا.
ليست هناك تعليقات:
إرسال تعليق