هسرد أحداث بترتيب الظهور :
1- صوره لأحمد شفيق رئيس الوزراء السابق و المرشح للرياسه وهو فى أحد المناسبات الأجتماعيه وحواليه مجموعه من الستات الحلويين
2- صورة حفيد المشير طنطاوى وهو مع أربع بنات فى احد المناسبات الشخصيه" بنات حلويين "...
3- مقال لأحد الصحفيين فى جريدة الفجر عن الأخوات فى جماعة الأخوان المسلميين بعنوان" نساء المتعه" وكيف تستخدمهم الجماعه فى جذب جماهيريه لها بالشارع
الاربع النقط السابقيين تم أستخدام كل واحده فيهم لمهاجمة الشخصيه العامه اللى ظهرت فيها يعنى تم مهاجمة حفيد المشير و أحمد شفيق و اللواء عتمان و مهاجمة قيادات الأخوان...
*طيب هو أحنا ليه دايما بنستخدم المرأه فى كل مره على أساس أنها حاجه وحشه وأنها شئ مثير أو سئ السمعه واللى يطلع مع واحده ست فى صوره يبقا قليل الادب هو أه صحيح المرأه مثيره بطبعها لكن أننا نتصيد لكل واحد هو خرج مع مين ولا حضن مين ولا راح فرح مع مين أعتقد أن دا مش من الحريه فى شئ ولا من "المدنيه_ الاسلاميه" اللى الناس بتنادى بتطبيق أحدهما...
كالعاده أحنا مجتمع متناقض مافيش أى مشكله أننا نشتم بأوسخ الشتايم على تويتر والفيس وفى الشارع و نكون منفتحين فى علاقتنا مع أصدقائنا من الجنسيين و نيجى بعدها نتصيد للناس صور وأخطاء غير مبرره
ماله حفيد المشير أن شاء الله يروح يرمى نفسه فى بيوت دعاره , أحنا مالنا؟
أحنا يهمنا جده و سرقته لفلوس البلد وأنتهاكاته اللأدميه مع ولادنا والدم اللى ماجاش حقه..
طب ماهو لو الموضوع تصيد أخطاء الشباب مش شرفاء أوى ومن السهل لأى حد يتلقط له صوره فى أى حته ويقولوا شوفوا الشباب اللى بيقولوا عايزين ثوره ..
الحريه اللى بنتكلم عليها تجبرنا أننا ماننتهكش الحياه الشخصيه للأفراد كل اللى يهمنا من الأشخاص تعاملاتهم السياسيه ,الاقتصاديه,الاجتماعيه
* الواضح يعنى وبلا أدنى مبرر للشك أن المجتمع دا شهوانى وحشى بطريقه فعلا وسخه كل تفسيره للأمور قايم على مبدأ راجل وست راجل وست ,مافيش حاجه أسمها أنسانيه أنك بتتعامل مع انسان قبل ما تبص لجنسه أنك بتتعامل مع أفكار مع عقل .
*مش معنى أنى ضد المشير أو أحمد شفيق أو الأخوان أنتهك حياتهم بالطريقه دى وأعمق فى المجتمع التفكير السطحى الجنسى فى سلبيات كتير جدا ممكن نركز عليها نفضحهم بيها.
نهائيا بفتكر موقف طلاق دكتور أيمن نور وجميله أسماعيل وأزاى أمن الدوله وقتها أستخدم دا فى بث شائعات فى الشارع لتشويه صورت دكتور أيمن نور وأحنا طبعا ما قدرناش نفرق بين شخص أيمن نور السياسى وأيمن نور الانسان فى حياته الشخصيه وفضل الشارع تجريح, أمن الدوله وقتها كان عارف طريقة تفكير الشعب المصرى اللى بيخلط كل حاجه ببعض وماعندوش تفرقة بين الحياه الشخصيه للرموز "أين كان مجال عمالها" و بين حياتهم المهنيه
ليست هناك تعليقات:
إرسال تعليق